चित्रिकरणासाठी काही ठिकाणे (Some Places for shooting)

          बऱ्याचदा दिग्दर्शकाला वास्तववादी चित्रिकरणासाठी योग्य लोकेशन्सची गरज असते. कोल्हापूर जिल्ह्यात अनेक गावात अशी लोकेशन्स उपलब्ध असून इथले लोकही चित्रपटनिर्मिती प्रक्रियेसंदर्भात बरेच उत्सुक असतात. शूटींगसाठी लागणारे सर्व प्रकारचे सहाय्य या लोकेशन्सवरती मिळू शकते.

कोल्हापूर उपहारगृहे आणि हॉटेल्स ( Eateries and Restaurants)

          चित्रीकरणासाठी खूप लांबून आलेल्या तंत्रज्ञ, कलाकारांच्या जेवणाचा प्रश्न मोठा असतो. चित्रिकरणाच्या वेळखाऊ आणि थकवणाऱ्या प्रक्रियेनंतर पोटपूजा महत्त्वाची असते. अशावेळी कोल्हापुरी मटण आणि तांबड्या – पांढऱ्या रश्श्याची चव वेड लावल्याशिवाय राहत नाही. कोल्हापुरकरांचा ठसकेबाज पाहुणचार जेवणात अनुभवयाला मिळतो. दुध कट्ट्यावर मिळणारे धारोष्ण दूध, शाकाहारी तसेच मांसाहारी जेवणाची लज्जत, जगप्रसिद्ध कोल्हापुरी मिसळ आणि तिचा कट ही कोल्हापुरच्या खाद्यसंस्कृतीची ठळक वैशिष्ट्ये सांगता येतील. कोल्हापुरचा खमंग वडापाव आणि भेळही पाहुण्यांना भुरळ घालते. साहजिकच कोल्हापुरकरांचा पाहुणचार मिळालेला प्रत्येक पर्यटक भारावून जातो. बदलत्या आधुनिक कोल्हापूरात पंचतारांकित हॉटेल्ससह चित्रनगरीच्या आजूबाजूला इतरही हॉटेल्स उपलब्ध आहेत. अलीकडे कोल्हापुरात इंटरनॅशनल फूड चेनमधील हॉटेल्स,रेस्टॉरंट्स, कॅफे सुरु झाली आहेत. 

जागतिक बाजारपेठेत कोल्हापुरचे स्थान ( Market place recognised in the global )

          कोल्हापुरचे चामडी चप्पल जगभरात प्रसिद्घ आहे. सामान्य नागरिकांसह उद्योगपती, राजकारणी, अभिनेते या मंडळींनाही कोल्हापुरी चपलाचे विलक्षण आकर्षण आहे. कोल्हापुरची चप्पल लाईन स्त्री– पुरुषांसाठी चामडी चपलांचे मार्केट म्हणून जगभरात प्रसिद्ध आहे. इथून थोड्याच अंतरावर दागिण्यांचे मार्केट असलेली गुजरी आहे. कोल्हापुरची ओळख असणारा साज केवळ इथेच तयार होतो. महिलांचा जीव की प्राण असणारा साज इथल्या कसबी कारागिरांच्य़ा हातून मागणीप्रमाणे तयार होतो. शिवाय कोल्हापूर म्हणजे गुळाची बाजारपेठ. राजर्षी छत्रपती शाहू महाराजांनी गुळाच्या व्यापाऱ्यांसाठी मार्केट वसवलं आणि अर्थव्यवस्थेला चालना मिळाली. 

          अशा अनेक गोष्टी तुम्हाला कोल्हापुरात बघायला मिळतील. शिवाय कोल्हापुरी फेटा आणि नऊवारी साडी म्हणजे स्त्री– पुरुषांच्या रुपाला सजवणारे अस्सल वस्त्रसाज. या सर्व वस्तू आणि वस्र बाजारपेठ चित्रनगरीपासून जवळच्याच अंतरावर आहे. कोल्हापुरातील फौंड्री उद्योगाने जगभरात आपल्या लौकिकाची मोहर उमटवली आहे. जगभरातल्या फौंड्री उद्योगात भारत दुसऱ्या क्रमांकावर आहे. यात कोल्हापुरचा सिंहाचा वाटा आहे. कोल्हापुर हे ऊसशेतीसाठी खूपच प्रसिद्ध आहे; साहजिकच साखर कारखाने आणि सहकार क्षेत्रामुळे जिल्ह्याची अर्थव्यवस्था मजबूत बनली आहे.

थंड आणि आल्हाददायी वातावरण

          कोल्हापूर शहर आणि परिसर थंड आणि आल्हाददायी वातावरणासाठी ओळखला जातो. शहराचं वैशिष्ट्य म्हणजे कोणत्याही ऋतूत त्रास जाणवत नाही. कोल्हापुरला लाभलेला पश्चिम घाट अर्थात सह्याद्रीचा सहवास इथल्या परिसराला जैवसमृद्धतेने मढवतो.  हिरवीगार शेती, बारमाही नद्या, आजूबाजूचे हिरवेगार डोंगर या सर्वांमुळे थंडगार वातावरण अनुभवायला मिळते. कोल्हापुरात प्रदूषणाचे प्रमाण कमी असल्याने हे वातावरण आरोग्यासाठी अत्यंत चांगले समजले जाते.