त्या काळातील चित्रपट निर्माते आणि अभिनेत्यांनी बदलत्या कथाशैलीला आणि तंत्राला अवगत केले आणि चित्रपटांची निर्मिती केली. यात कोल्हापुरचे व्ही शांताराम, अनंत माने, सुभाष भुर्के, डी.सी अंबपकर,अभिनेते चंद्रकांत, शंकर सावेरकर, वसंत शिंदे या श्रेष्ठ कलावंतांचा उल्लेख करायलाच हवा.

कादंबरीचे तंत्र, कथेची नवी शैली, आधुनिक तंत्रज्ञान या गोष्टी नव्या काळात कळीच्या ठरणार आहेत याची जाणीव या अभिनेते– दिग्दर्शकांना झाली होती. फिल्मसिटीसारखी आधुनिक तंत्रांनी सज्ज अशी यंत्रणाच हे करू शकते याचीही जाणीव या मंडळींना एव्हाना झाली होती.

ध्येयाने झपाटलेल्या कलाकार मंडळींनी फिल्मसिटीचे काम तडीस नेण्याचा चंग बांधला. कोल्हापूर शहराच्या दक्षिणेकडे असणाऱ्या मोरेवाडीने सर्वांचे लक्ष आता वेधून घेतले होते. सर्व औपचारिकता पूर्ण झाल्या आणि ७८ एकरांची कोल्हापूर चित्रनगरी अर्थात फिल्मसिटी सुरु झाली. कोल्हापूर फिल्मसिटी सुरु झाली १९८४ साली; पण अजून काही आव्हाने बाकी होती. १९८०–९० च्या दशकात दूरचित्रवाणी आणि मालिकांनी प्रेक्षकांना आकर्षित करायला सुरुवात केली होती. चित्रपटांना आता समांतर मनोरंजन साधन म्हणून मालिका प्रसारित होऊ लागल्या. चित्रपट माध्यमाला हे एक आव्हानच होते पण ते आभासी आणि काही काळापुरतेच ठरले. चित्रपट टिकला, वाढला आणि समृद्ध होत गेला.